Tunisia vs Burkina Faso [ Match Report ]

par **Admin** Mer 1 Fév - 13:45

**تحليل مباراة تونس و بوركينا فاسو **
هنري كاسبارجاك يجري 3 تحويرات في التشكيلة الأساسيّة للمنتخب و هي دخول أيمن عبد النور كظهير أيسر مكان علي معلول ، تبديل صيام بن يوسف على الجهة اليسار من الدفاع و دخول محمّد علي اليعقوبي على الجهة اليمين .
نبداو بأوّل نقطة و هي الأهم في هذه المباراة و هي دخول عبد النور مكان علي معلول هذا التغيير إلّي ما عندوش مبرّر , أوّلا ضرّ المنتخب هجوميّا هذاكا علاش ماريناش يوسف المساكني في نهارو و ما لقاش المساندة الكافية على اليسار و خلّاه يخسر برشا كور .
ثانيا نقطة قوّة المنتخب هي في الأظهرة العصريّة إلّي عندو علي معلول على الجهة اليسار و حمدي النڨّاز على الجهة اليسار : يعني عبارة فسّخت نقطة من نقاط قوّتك .
ثالثا سي هنري كاسبارجاك لعب على نقاط قوّة المنتخب البوركينابي حتّى ضيّع نقاط قوّتو؛ علي معلول لعب من جيهتو ساديو ماني ، و لعب من جيهتو رياض محرز و ما تنفّسوش .
يعني شفنا تفوّق كلّي من باولو دوارتي على هنري كاسبارجاك إلّي فرض عليه العودة للدفاع .
و أخيرا نحن تعوّدنا في المنتخب أنّنا ندافعو بالهجوم .. نشدّو الكورة القدّام و نجبرو المنافس أنّو يدافع لكن إلّي صار هو العكس تماما .
نقطة أخرى تظّهر تفوّق باولو على هنري هي حطّان بايالا على الجهة اليمين , اللاعب المعروف بخصالو الدفاعيّة أكثر من الهجوميّة باش يمنع تقدّم حمدي النڨّاز على الرواق و نجح في هذا خاطر حمدي النڨّاز إلّي تعوّدنا بيه يطلع كجناح أيمن و الخزري يدخل للوسط يعطي الحلول لحامل الكورة ريناه كان في زوز ولّا تلاثة كور .
نحكيو شويّة على الدفاع إلّي على المستوى الفردي ماكانتش فمّا أغلاط إنجّمو نحكيو عليها بل بالعكس المردود الفردي لكلّ من اليعقوبي و صيام بن يوسف كان مرضي لكن على المستوى الجماعي كانت كارثة بكلّ ما في الكلمة من معنى رينا برشا مساحات بين ثنائي محور الدفاع ؛ رينا زادة برشا مساحات بين محور الدفاع و متوسّطي الميدان الدفاعي ؛ أغلب الحوارات الهوائية كانت من نصيب المنتخب البوركينابي خاطر رينا ديما يا فرجاني ساسي يا أمين بن عمر في الحوارات الهوائيّة إلّي ما عندهمش الفيزيك اللازم باش يدخلو في إلتحامات مع لاعبي المنتخب البوركينابي .
السرّ وراء نجاح المنتخب طوال مسيرتو في الكان هاذي كانت الكورات الثانية و هي مفتاح الفوز ، كي نحكيو عالكورة الثانية هي الكورة الثانية في الدفاع و بناء الهجمة و الكورة الثانية في الهجوم هي إلّي باش تعطيك إمكانيّة بناء هجمة جديدة و هذا إلّي ما شفناشي في مباراة بوركينا فاسو و أغلبيّة الكورات الثانية كان لصالح المنتخب البوركينابي.
نحكيو توّا على الخط الهجومي للمنتخب إلّي رينا طوال ال90 دقيقة طه ياسين الخنيسي معزول وحدو القدّام و لحقيقة ما جاتوش حتّى فرصة واضحة و حسب رأيي عمل إلّي عليه و أكثر و ربح كلّ الثنائيات في الماتش لكن الكورة أڨوال .
المنتخب في مبارايات التصفيات بما فيهم ماتش السينيغال كان بناء الهجمة يعتمد على التمريرات القصيرة , و الإنتقال من الحالة الدفاعيّة إلى الحالة الهجوميّة كان سريع يعني 4 ، 5 تمريرات و المنتخب يلقى روحو في الهجوم إمّا على الأطراف أو من وسط الميدان و هذا إلّي شفناه في مباراة السينيغال ، الجزائر و الزيمبابوي لكن الشيء هذا ما ريناهش في ماتش بوركينا فاسو، كانت أغلب التمريرات في دفاعنا , يعني إستحواذ سلبي على الكورة و أوّل ما توصل الكورة للهجوم يتمّ الإطالة في مسك الكورة من يوسف المساكني ولاّ من نعيم السليتي و بالتالي قطع الكورة يكون ساهل للمنتخب البوركينابي إلّي بدورو ريناه كيفاش يطيل في هجماتو لإرهاق نوعا ما عناصر منتخبنا الوطني و لإيجاد ثغرة في دفاع المنتخب .
نحكيو توّا على الخط الهجومي للمنتخب إلّي رينا طوال ال90 دقيقة طه ياسين الخنيسي معزول وحدو القدّام و لحقيقة ما جاتوش حتّى فرصة واضحة و حسب رأيي عمل إلّي عليه و أكثر و ربح كلّ الثنائيات في الماتش لكن الكورة أڨوال .
المنتخب في مبارايات التصفيات بما فيهم ماتش السينيغال كان بناء الهجمة يعتمد على التمريرات القصيرة و الإنتقال من الحالة الدفاعيّة إلى الحالة الهجوميّة كان سريع يعني 4 ، 5 تمريرات و المنتخب يلقى روحو في الهجوم إمّا على الأطراف أو من وسط الميدان و هذا إلّي شفناه في مباراة السينيغال ، الجزائر و الزيمبابوي لكن الشيء هذا ما ريناهش في ماتش بوركينا فاسو، كانت أغلب التمريرات في دفاعنا يعني إستحواذ سلبي على الكورة و أوّل ما توصل الكورة للهجوم يتمّ الإطالة في مسك الكورة من يوسف المساكني ولاّ من نعيم السليتي و بالتالي قطع الكورة يكون ساهل للمنتخب البوركينابي إلّي بدورو ريناه كيفاش يطيل في هجماتو لإرهاق نوعا ما عناصر منتخبنا الوطني و لإيجاد ثغرة في دفاع المنتخب .
في لقاء بوركينا فاسو السيّد هنري كاسبارجاك لعب دفاع متأخّر على عكس إلّي ريناه في المبارايات السابقة و هذا الشيء إلّي سهّل في ضرب خطّ وسط الميدان نظرا لكيما تحدّثت في السابق للمساحات الشاسعة الموجودة بين المدافعين و متوسّطي الميدان الدفاعي و بالتالي شفنا المهاجم البوركينابي ناكولما يلقى روحو ديما في الوضعيّة إلّى يحبّها و نعرفو مليح خطورة هذا اللاعب لمّا يكون عاطي بظهرو للمرمى .
بالنسبة للهدفين إلّي قبلهم المنتخب :
الهدف الأوّل عادي بالنسبة ليّا و لو أنّو يتحمّلو فيه شويّة مسؤوليّة نعيم السليتي و حمزة لحمر خاطر مالأوّل كانو محضّرين رواحهم على أساس أنّو المخالفة باش تتلعب بالشّكل هذاكا بالظبط و كان بالإمكان التفاهم بين نعيم و حمزة على غلق كلّ الزوايا و نعاود نقول شويّة مسؤوليّة .
أما بالنسبة للهدف الثاني فسيبقى نقطة سوداء في تاريخ المنتخب : عندك 5 دقائق ينجّم يصيرو فيهم برشا حاجات و الكورة مدوّرة , نراو ما فمّاش تغطية دفاعيّة وينو المدرّب باش يكلّم الملاعبيّة وينو مساعد المدرّب ؟؟؟؟ لحقيقة الهدف الثاني يطرح أكثر من سؤال
. الخلاصة و لإعطاء كلّ ذي حقّ حقّه هذا من رأي تقيّيم اللاعبين إلّي شاركو في "كان"2017 :
أيمن المثلوثي : 6.5 أيمن إلّي ما عملش أغلاط قاتلة كان ديما يوجّه في الدفاع متاعو و كان حاسم في مباراة الجزائر و نتصوّر لولا تصديّاتو في مباراة الجزائر لما وصلنا إلى هذا الدور .
حمدي النڨّاز : 6.5 حمدي عدّى "كان" محترمة حسب رأيي كان متميّز دفاعيّا ، هجوميّا النڨّاز ما كانش كالعادة ربّما هي توصيات المدرّب لكن حمدي يبرهن أنّو أفضل ظهير أيمن في تونس .
صيام بن يوسف : 6 صيام ما عملش أغلاط فرديّة لكن جماعيّا شفنا برشا ميساحات بينو و بين النڨّاز و بينو و بين عبد النّور لكن مردود محترم من بن يوسف .
أيمن عبد النّور : 4 أيمن إلّي ما حطّو حدّ باش يكون نقطة ضعف المنتخب بل بالعكس الكلّ كان ينتظر عبدو إلّي عندو الخبرة عبدو المحترف في فالنسيا لكن المستوى إلّي ظهر بيه عبد النور في هذا الكان يطرح أكثر من سؤال .
علي معلول : 6 مردود يذكر فيشكر لعلي إلّي الكلّ كان متخوّف منّو خاطرو باش يواجه لاعبين من أقوى اللاعبين على المستطيل الأخضر و هوما رياض محرز و ساديو ماني و إلّي من رأي نجح في إيقافهم هذا إلى جانب العمل الهجومي إلّي قام بيه معلول و يبرهن مرّة أخرى إنّو قيمة ثابتة في المنتخب .
محمد أمين بن عمر : 8.5 آش باش نحكي و آش باش نقول يا أمين ، أفضل لاعب في المنتخب في "كان " 2017 الناس الكلّ كانت خايفة أوّل كان لبن عمر و ما عندوش خبرة لكن ظهّر إلّي هو لاعب من العيار الثقيل و جوهرة تونسيّة لامعة و إن شاء لله باش تشوفوه في أكبر الفرق الأوروبيّة .
فرجاني ساسي : 7 مردود متميّز جدّا من فرجاني إلّي ظهّر إنسجام كبير بينو و بين بن عمر لحقيقة أبهرني فرجاني إلّي في تطوّر مستمرّ و وسط الميدان في أمان في وجود ساسي إن شاء لله .
يوسف المساكني : 7.5 البعض قال أنّو إنتهى ، البعض قال أنّو دفن روحو في قطر و إلّي ما عندوش بلاصتو في المنتخب لكن يوسف يلجم أفواه كلّ المشكّكين و يظهر بمستوى عالمي يخلّينا نتفكّرو لمسات يوسف التّرجي .
نعيم السلّيتي : 8 نعيم يا نعيم تونس في حضورك في نعيم ، السلّيتي هو المكسب إلّي خرجنا بيه مالكان هاذي بالرّسمي اللاعب هذا إن شاء لله يكون إكتسب خبرة و عرف "الأفريك" و باش يكون عندو كلمتو في قادم المحافل القاريّة و الدوليّة .
وهبي الخزري : 6 وهبي كيما عبد النّور ما كانوش عند حسن ظنّ الشعب التونسي ، الناس الكلّ كانو ينتظرو في وهبي باش يكون هو نجم المنتخب لكن ... ممكن خاطر ما عندوش برشا كورة في ساقية خاطرو على البنك في ساندرلاند لكن تصرّف الخزري مع هنري في مباراة بوركينا فاسو ما عندوش مبرّر و لا أحد يعلو فوق تونس .
طه ياسين الخنيسي : 8 المنتخب في أمان في وجود الخنيسي من زمان ما ريناش مهاجم في حجم ياسين إلّي من رأيي باش يزيد يكسب الخبرة في الترجّي و باش يحمل آمال كلّ التوانسة ، طه ظهر بمستوى رائع بالنسبة للاعب أوّل مرّة يلعب "كان".
هنري كاسبارجاك : 7 كان ينجّم يكون التقييم أفضل من هكّا يا هنري لولا "الزلعة" الأخيرة ، و للمرّة الثانية يظهّر المنتخب أنّه ما يلعب كورة مزيانة كان مع هنري و إلّي نشكروه خاطر خلاّنا نحلمو بالتتويج بهذا اللقب وقتلّي الناس الكلّ قالت إلّي المنتخب موش باش يتجاوز الدور الأوّل .
بقلم : مروان عليبي